Гістарычная даведка

29 лютага 1924 года на базе пададдзела мер і вагаў Народнага камісарыята фінансаў Беларускай Савецкай Сацыялістычнай Рэспублікі (Наркамфіна БССР) створана Беларуская палата мер і вагаў, якая ўзначаліла метралагічную службу ў рэспубліцы.

У 1939 г. пасля далучэння Заходняй Беларусі да БССР загадам Упаўнаважанага Камітэта па справах мер і вымяральных прыбораў пры Савеце Народных камісараў (Саўнаркаме) БССР Чэнчыкава А.І. утворана абласное Упраўленне мер і вымяральных прыбораў Палескай вобласці, якое складаецца з шэрагу аддзяленняў, якое размяшчалася па адрасе г. Брэст вул. Карла Марка, дом 17 і мела двухзначны нумар тэлефона 83.

Брэсцкаму аддзяленню быў прысвоены 3-ці разрад. У той час аддзяленнямі павяраліся сродкі вымярэнняў толькі механічных і геаметрычных велічынь.

У чэрвені 1941 г. пачалася Вялікая Айчынная вайна. Абсталяванне Брэсцкага паверачнага аддзялення не паспелі эвакуіраваць. За гады вайны моцна папакутавала памяшканне Брэсцкага аддзялення. Усё абсталяванне альбо загінула, альбо было вывезена немцамі.

Пасля вызвалення Беларусі загадам ад 25-га жніўня 1944 г. № 168 Упаўнаважанага Камітэта па справах мер і вымяральных прыбораў пры Саўнаркаме БССР Я. Фукса, праца Брэсцкага аддзялення была адноўлена – утвораны Камітэт па справах мер і вымяральных прыбораў пры Брэсцкім аблвыканкаме. Назначаны ўпаўнаважаны, загадам якога ад 1-га кастрычніка 1944 г. № 6 у Брэсце адкрыта рамонтна-юстыровачная майстэрня.

Для арганізацыі работ па паверцы прыбораў выдаецца загад ад 12-га снежня 1947 г. нумар 237 Упаўнаважанага Камітэта па справах мер і вымяральных прыбораў пры Савеце Міністраў БССР “Аб упарадкаванні паверачнай дзейнасці абласных Упраўленняў”. Утворана Брэсцкае абласное Упраўленне Камітэта па справах мер і вымяральных прыбораў, якое набывае новае паверачнае абсталяванне, пашырае свае магчымасці. Рашэннем Брэсцкага аблвыканкама зацвярджаецца план адкрыцця паверачных аддзяленняў у раёнах Брэсцкай вобласці.

З 1954 г. Брэсцкае абласное Упраўленне Камітэта па справах мер і вымяральных прыбораў пераўтворана ў Дзяржаўную кантрольную лабараторыю за стандартамі і вымяральнай тэхнікай (ГКЛ), для якой у верасні 1954 г. пачынаецца будаўніцтва 2-х фінскіх домікаў плошчай 170 м2 па вул. Наганава, 6.

У 1965 г. на базе ДКЛ створана Брэсцкая абласная лабараторыя дзяржаўнага нагляду за стандартамі і вымяральнай тэхнікай (ЛДзН), на якую дадаткова ўскладзены функцыі дзяржнагляду за ўкараненнем і выкананнем стандартаў, тэхнічнымі ўмовамі і станам вымяральнай тэхнікі, правядзення работ па метралагічнай атэстацыі сродкаў вымярэнняў.

У 1976 годзе лабараторыя атрымлівае новы 2-х павярховы будынак плошчай 1282 кв.м па вул. Кіжаватава, 10/1.

У 1984 – 1985 гг. практычна завершана стварэнне рэспубліканскай сістэмы выпрабаванняў харчовай і сельскагаспадарчай прадукцыі, у Брэсцкай ЛДзН адкрываецца цэнтр выпрабаванняў сельскагаспадарчай прадукцыі (ГІЦ).

Пасля аварыі на Чарнобыльскай АЭС у абласных і гарадскіх цэнтрах рэспублікі адкрываюцца праверачныя лабараторыі па дазіметрыі і радыёметрыі.

У 1987 г. Брэсцкая ЛДН перайменавана ў Брэсцкі цэнтр стандартызацыі і метралогіі.

Увядзенне ў 1994 годзе абавязковай сертыфікацыі прадукцыі абумовіла неабходнасць стварэння органа па сертыфікацыі харчовай і сельскагаспадарчай прадукцыі. У гэтым жа годзе Дзяржстандарт дэлегаваў цэнтру права органа па акрэдытацыі лабараторый.

У 1996—1999 гг. у сувязі з пастаўленымі новымі задачамі, пашырэннем наменклатуры работ для аддзела метралогіі быў набыты і рэканструяваны корпус у Паўночным гарадку. Будынак з’яўляецца гісторыка-культурнай каштоўнасцю і ахоўваецца заканадаўствам.

У красавіку 1998 года цэнтр атрымаў права афіцыйнага распаўсюджвання стандартаў.

Загадам Дзяржстандарта ад 10 красавіка 2000 г. № 101 прадпрыемства перайменавана ў Рэспубліканскае унітарнае прадпрыемства “Брэсцкі цэнтр стандартызацыі, метралогіі і сертыфікацыі” (РУП “Брэсцкі ЦСМС”).

Дзейнасць па аказанні кансалтынгавых паслуг па распрацоўцы і ўкараненні сістэм якасці ў адпаведнасці з патрабаваннямі стандартаў ІСО 9000 спецыялісты прадпрыемства пачалі ажыццяўляць з 1999 года, а з 2002 года пачаў працаваць орган па сертыфікацыі сістэм менеджменту.

У чэрвені 2012 года ў структуру прадпрыемства ўключаны Цэнтр па рамонце і тэхнічным абслугоўванні «Эталон» на вул. Спакойнай, д.1 разам з усімі плошчамі, дзе ў цяперашні час працягваецца мадэрнізацыя і развіваюцца новыя напрамкі дзейнасці.

Разгорнуты работы па абслугоўванні, рамонце і продажы сродкаў вымярэнняў і іншага метралагічнага абсталявання.

З 1-га ліпеня 2013 г. са структуры прадпрыемства выдзелена Брэсцкая абласная інспекцыя Дзяржстандарта (загад Дзяржстандарта ад 28 чэрвеня 2013 г. № 76).

З 2014 года функцыянуе аддзел выпрабаванняў і вымярэнняў, дзейнасць якога ахоплівае шэраг найбольш важных для прадпрыемстваў рэгіёну пытанняў: выпрабаванні для мэт аховы працы, электравымярэння, выпрабаванні і вымярэнні ў будаўніцтве, экалогіі і інш.

З лістапада 2021 г. РУП “Брэсцкі ЦСМС” з’яўляецца акрэдытаваным пра-вайдэрам праверкі кваліфікацыі выпрабавальных лабараторый і ўпаўнаважаны на правядзенне злічэнняў вынікаў вымярэнняў.

Брэсцкі цэнтр стандартызацыі, метралогіі і сертыфікацыі не раз падвяргаўся істотным пераўтварэнням, змяняліся назвы і адрасы размяшчэння.

У адпаведнасці з патрабаваннямі часу з’яўляліся новыя напрамкі, удасканальвалася структура, мяняліся падыходы, але нязменнымі заставаліся прафесіяналізм, адказнасць і аб’ектыўнасць работнікаў цэнтра.

Усе напрамкі дзейнасці былі і застаюцца цесна звязанымі з эканомікай краіны, паколькі павінны быць базавым складальнікам інфраструктуры якасці ў рэгіёне.